ഹാ! കൂടി നാമെല്ലാരും ചേര്‍ന്നു Ha koodi Namellarum Chernu

ഹാ! കൂടി നാമെല്ലാരും ചേര്‍ന്നു
പുകഴ്കൊണ്ടാടണം - സ്വര്‍ഗ്ഗ -
വാതിലാകും യേശുനാഥനെ വാഴ്ത്തിപ്പാടണം

വേദനപ്പെടും ഏഴകള്‍ക്കഴലു തീരുവാന്‍ - വന്നു
മേദിനിയതില്‍ മനുഷ്യാവതാരന്‍ ആയിതാ - (ഹാ!..)

വാനവര്‍ വാഴ്ത്തിപ്പാടുന്ന കര്‍ത്തനായ താന്‍ - ദുഷ്ട
മാനവന്‍ ഈടേറുവാന്‍ ഒരടിമയായിതാ - (ഹാ!..)

ആദരവറ്റു ഭൂമിയില്‍ വെറിയരാം നരര്‍ - മര-
ണാധികളൊഴിവതിന്നു താണു ദേവനും - (ഹാ!..)

സേനകളിന്‍ അധിപതി അവനെന്നാകിലും - നര
ജീവനെ മീളാന്‍ അവന്‍ തന്നുയിരിനെ വിട്ടാന്‍ - (ഹാ!..)

ദാരുണ മരണാധിയെ മരിച്ചമര്‍ത്തിനാന്‍ - ഭൂ-
മണ്ഡലത്തില്‍ നിന്നുയിര്‍ത്തു വിണ്ണിലെത്തിനാന്‍ - (ഹാ!..)

പാപികള്‍ക്കു പിതാവിനോടിരന്നു മോചനം - നിജ
പാദസേവക ജനങ്ങളെ രക്ഷ ചെയ്യുന്നോന്‍ - (ഹാ!..)